அனோமி’ திரைப்பட விமர்சனம்

 அனோமி’ திரைப்பட விமர்சனம்

 Casting : Bhavana, Rahman, Shebin Benson, Vishnu Aghasthiya, Binu Pappu, Arjun Lal

Directed By : Riaz Marath

Music By : Harshavaradhan Rameshwar

Produced By : Kumar Mangat Pathak, Abhishek Pathak, Blitzkrieg Films, Bhavana, Aadith Prasasana Kumar

 

தடவியல் நிபுணரான பாவனா, சாலை விபத்து ஒன்றில் தனது பெற்றோரை இழக்கிறார். அந்த விபத்தில் சிக்கி உயிர் பிழைத்த அவரது தம்பி மன ரீதியாக பாதிக்கப்பட்டு, தற்கொலை முயற்சியில் ஈடுபடுகிறார். அவருக்கு தொடர் சிகிச்சை அளித்து அவரை காப்பாற்றும் முயற்சியில் பாவானா ஈடுபடுவதோடு, அவர் தான் தன் உலகம் என்று வாழ்கிறார். இதற்கிடையே, பாவனாவின் தம்பி போன்ற மனநிலையில் இருக்கும் இளைஞர் ஒருவர் தற்கொலை செய்துக் கொள்கிறார். அந்த வழக்கை காவல்துறை அதிகாரி ரஹ்மான் மிக சாதாரணமாக கையாண்ட நிலையில், சில தினங்களில் அதே முறையில் பாவனாவின் தம்பியும் இறக்கிறார். இந்த இரண்டு மரணங்களுக்கு இருக்கும் ஒற்றுமை மற்றும் பிரேத பரிசோதனையில் கிடைத்த சில தகவல்களை வைத்து, இரண்டும் கொலை என்பதை பாவனா கண்டுபிடிக்கிறார். ஆனால், இந்த விசயத்தில் காவல்துறை தொடர்ந்து மெத்தனம் காட்ட, மூன்றாவதாக இளம் பெண் ஒருவர் அதே பாணியில் கொலை செய்யப்படுகிறார். இதன் மூலம் தொடர் சைக்கோ கொலை என்பதை உறுதிப்படுத்தும் பாவானா, கொலையாளியை பிடிக்க களத்தில் இறங்குகிறார். இந்த முறை காவல்துறையும் தீவிரம் காட்ட, வழக்கு சூடுபிடிக்க தொடங்குகிறது. 

 

கொலை நடந்த இடங்களில் கிடைத்த நான்கு சக்கர வாகனத்தின் டயர் அடையாளம் மற்றும் கொலை செய்யப்பட்டவர்களின் உடலில் கலந்திருக்கும் அமிலம், இவை இரண்டை மட்டுமே தடயங்களாக வைத்துக் கொண்டு கொலையாளியை தேடிச் செல்லும் பாவனா, அவரை எப்படி கண்டுபிடிக்கிறார் ?, எதற்காக இந்த கொலைகள்? என்பதை விறுவிறுப்பாகவும், வியக்க வைக்கும் விதத்திலும் சொல்வது தான் ‘அனோமி’. கதையின் நாயகியாக நடித்திருக்கும் பாவனா, தடவியல் நிபுணர் என்றாலும், காவல்துறையை மிஞ்சும் விதத்தில் தனது புலன் விசாரணை மூலம் படத்தை விறுவிறுப்பாக நகர்த்திச் செல்கிறார். பெரிய அளவிலான தடயங்கள் இல்லை என்றாலும், கொலையாளியை அவர் நெருங்கும் விதம், சீரியஸான காட்சிகளை கையாண்ட முறை என தன் முதிர்ச்சியான நடிப்பின் மூலம் தன் கதாபாத்திரத்திற்கு பெரும் பலம் சேர்த்திருக்கிறார்.

 

காவல்துறை அதிகாரியாக நடித்திருக்கும் ரஹ்மானின் கதாபாத்திரம் ஆரம்பத்தில் சாதாரணமாக பயணித்தாலும், இரண்டாம் பாதியில் கதையை சுமந்து, பாவனாவுக்கு தோள் கொடுக்கும் கதாபாத்திரமாக கவனம் ஈர்க்கிறது. தனது அளவான நடிப்பு மூலம் படத்திற்கு ரஹ்மான பலம் சேர்த்திருக்கிறார்.

 

பாவனாவின் தம்பியாக நடித்திருக்கும் ஷெபின் பென்சன், காதலனாக நடித்திருக்கும் அர்ஜுன் லால், பினு பப்பு, விஷ்ணு அகஸ்தியா என மற்ற வேடங்களில் நடித்திருப்பவர்கள் திரைக்கதையில் முக்கிய பங்காற்றியிருக்கிறார்கள்.

 

ஒளிப்பதிவாளர் சுஜித்சாரங், கொலை செய்யப்பட்டவர்களின் கண்கள் ஏதோ சொல்ல வருவதை தனது கேமரா மூலம் பார்வையாளர்களுக்கு புரிய வைத்திருப்பதோடு, கொலைக்கான காரணத்தை காட்சி மொழியில் விவரித்த விதம் மூலம் வியக்க வைத்திருக்கிறார். 

 

ஹர்ஷவர்தன் ராமேஸ்வரின் இசையில் பாடல்கள் கதைக்களத்தை விவரிக்கும் விதத்தில் அமைந்திருக்கிறது. பின்னணி இசை அதிகம் சத்தம் இன்றி, அதே சமயம் திரைக்கதையில் இருக்கும் பதற்றத்தையும், பரபரப்பையும் அதிகரிக்கும் வகையில் பயணித்திருக்கிறது.

 

படத்தின் ஆரம்பத்திலேயே கதைக்குள் பயணிக்க தொடங்கிவிடும் பார்வையாளர்களின் கவனம் சிதறாதபடி காட்சிகளை தொகுத்திருக்கும் படத்தொகுப்பாளர் கிரியன் தாஸ், படத்தை வேகமாக நகர்த்திச் சென்றாலும், இயக்குநர் சொல்ல முயற்சித்திருக்கும் முக்கியமான விசயத்தை எளிதில் புரிய வைத்திருக்கிறார்.

 

எழுதி இயக்கியிருக்கும் ரியாஸ் மராத், கிரைம் சஸ்பென்ஸ் திரில்லர் மற்றும் சைக்கோ திரில்லர் ஜானர் படம் என்றாலும், கொலைக்கான காரணத்தை வித்தியாசமாக கையாண்டிருப்பதோடு, அதை காட்சிப்படுத்திய விதத்தை தொழில்நுட்ப ரீதியாக பிரமாண்டமாகவும், புதிதாகவும் படமாக்கி பார்வையாளர்களிடம் பாராட்டு பெறுகிறார்.